सप्तरी – अमेरिकी राष्ट्रपति डोनाल्ड ट्रम्पविरुद्ध प्रतिनिधिसभाबाट महाअभियोग पारित भएको छ । यससँगै ट्रम्प इतिहासमै एकै कार्यकालमा दोस्रो पटक महाअभियोग भोग्ने पहिलो राष्ट्रपति बनेका छन् । विपक्षी दल डेमोक्रेटका सांसदहरुले ट्रम्पमाथि संसद भवनमा आक्रमण गर्न आफ्ना समर्थकलाई उक्साएको आरोप लगाएका छन् । विपक्षीले त विरोध गरेका छन् नै, यस पटक ट्रम्पविरुद्ध उनको आफ्नै पार्टी रिपक्लिकनका सांसदहरुले पनि मतदान गरे ।

२ सय २२ डेमोक्रेट सांसदहरुका साथमा १० जना रिपब्लिकन सांसदहरुले पनि ट्रम्पको विरुद्ध मतदान गरेका छन् । प्रतिनिधिसभाबाट महाअभियोग प्रस्ताव पारित गर्न केवल २ सय १८ मत पर्याप्त थियो । २ सय २२ जना डेमोक्रेटकै समर्थनमा ट्रम्पविरुद्ध महाअभियोग पारित हुन सक्थ्यो । तर, १० जना रिपब्लिकन पनि थपिएपछि ट्रम्पलाई महाअभियोग लगाउने पक्षमा कूल २ सय ३२ मत परेको थियो । १ सय ९७ सांसदले मात्र ट्रम्पलाई महाअभियोग नलगाउने पक्षमा मतदान गरे ।