सप्तरी,२३ असोज: नेपालगञ्जस्थित भेरी अस्पतालका कर्मचारीविरुद्ध अख्तियार दुरुपयोग अनुसन्धान आयोगले भ्रष्टाचार मुद्दा दायर गरेको छ। अख्तियारले बिहीबार विशेष अदालतमा १६ लाख १३ हजार ९ सय ७५ रुपैयाँ हिनामिना भएको दाबी गर्दै मुद्दा दायर गरेको हो।

अस्पतालमा कार्यरत कम्प्युटर अपरेटर अरूणराज खनालले विभिन्न फर्म तथा पसलेहरूबाट लिएको कमिसनबापतको रकम र चेकसमेत आफ्नो कार्यकक्षमा १६ लाख १३ हजार ९ सय स्रोत नखुलेको नगद रकम निजकै कार्यकक्षमा राखेको अवस्थामा नियन्त्रणमा लिएको आरोपपत्रमा खुलाएको छ।

अनुसन्धानको क्रममा भेरी अस्पताल, नेपालगञ्जका लेखा अधिकृत माधव प्रसाद आचार्य, कम्प्युटर अप्रेटर खनाल, लेखापाल ईन्द्र बहादुर खत्री र सहलेखापाल प्रेम बहादुर खत्रीसमेतको मिलेमतोमा आर्थिक वर्ष ०७६/७७ को लागि सेवा प्रदायक फर्म तथा पसलहरूबाट जम्मा १६ लाख १३ हजार भ्रष्टाचार गरेको अख्तियारको आरोपपत्रमा उल्लेख छ।

अख्तियारले उनीहरुसँग एक लाख ६६ हजार ५ सय मूल्य बराबरको मोबाइल तीन थान समेत जफत गर्न माग गरेको छ। बाँकी बिगो १ लाख ३२ हजार ५ सय ९५ असुल उपर गर्नुपर्ने अख्तियारको आरोपपत्रमा उल्लेख गरिएको छ।

त्यसै गरि अख्तियारले ११ वटा फर्मका सञ्चालकलाई पनि मुद्दा दायर गरेका छन । अख्तियारले ११ वटा फर्मका संचालकहरुलाई एक लाखदेखि २० हजारसम्म जरिवाना गर्न माग गरेका हुन।