काठमाडौं – नेकपाको प्रचण्ड-नेपाल समूहले आज देशभर आमहड्ताल गरेको छ । काठमाडौं उपत्यका विभिन्न स्थानमा पनि आमहड्तालको प्रभाव परेको छ । काठमाडौंका सडकमा प्रचण्ड-नेपाल समूहका नेता कार्यकर्ता देखिएका छन् ।

यस्तै ललितपुरको सातदोबाटोमा आम हड्तालको आह्वान गर्दै अध्यक्ष पुष्पकमल दाहाल प्रचण्ड पनि सहभागी भएका छन् । सातदोबाटो चोकमा प्रदर्शनकारीले काम चलाउ म्यादी सरकार मुर्दावाद, असंवैधानिक नियुक्ति खारेज गर, राष्ट्रघाती होसियारलगायतक नारा लगाएका थिए।

यस्तै आज नै काठमाडौंको कलंकीबाट नेकपा स्थायी कमिटी सदस्य अष्टलक्ष्मी शाक्य, हितमान शाक्य लगायतका नेता कार्यकर्ता पक्राउ परेका छन् । यस्तै गोंगबुमा पनि ट्याक्सीमा आगजनी भएको छ । बन्दको आह्वानमा सडकमा निस्किएका प्रचण्ड नेपाल समूहका नेता कार्यकर्तालाई प्रहरीले पक्राउ गरेको हो ।

सरकारले संवैधानिक निकायहरुमा जबरजस्ती प्रमुख र सदस्यहरु नियुक्त गरिएको भन्दै प्रचण्ड–नेपाल समूहले आज आमहड्ताल गरेको हो ।