काठमाडौं – प्रधानमन्त्री केपी शर्मा ओली राष्ट्रपति भवन शीतलनिवास पुगेका छन् ।

मंगलबार निर्वाचन आयोगका पदाधिकारीसँगको छलफल सकेर प्रधानमन्त्री ओली सीधै राष्ट्रपति निवास पुगेको सञ्चारविज्ञ रामशरण बजगाईंले जानकारी दिए ।

“निर्वाचनसम्बन्धी जानकारी गराउन प्रधानमन्त्रीज्यू शीतलनिवास जानुभएको हो । वैशाख १७ गते र २७ गते दुई चरणमा निर्वाचन गराउन हिजो मन्त्रिपरिषद्को बैठकले आवश्यक निर्णय गरेको थियो । आजै मात्र पनि निर्वाचन आयोगसँग चुनावको तयारीबारे छलफल भयो । यो सबै जानकारी गराउन उहाँ शीतलनिवास जानुभएको हो,” बजगाईंले बाह्रखरीसँग भने ।

सरकारले वैशाख १७ गते प्रदेश नम्बर–२, गण्डकी, लुम्बिनी र कर्णाली प्रदेशमा तथा २७ गते बाँकी प्रदेशमा निर्वाचन गर्ने निर्णय गरेको छ । प्रधानमन्त्रीले आजै मात्र आयोगका प्रमुख आयुक्त र आयुक्तहरूलाई भेटेर निर्वाचन प्रक्रिया अघि बढाउन आवश्यक निर्देशन दिएका थिए ।