काठमाडौं । सिद्धार्थ इन्स्योरेन्स कम्पनीले चालू आवको छ महीनामा रू. १३ करोड ६९ लाख नाफा कमाएको छ ।

यो नाफा गत आवको सोही अवधिको तुलनामा ४९ प्रतिशतले वृद्धि भएको हो । कम्पनीले गत आवको दोस्रो त्रैमासमा रू. ९ करोड १६ लाख नाफा कमाएको थियो । चालू आवको दोस्रो त्रैमासमा कम्पनीको आम्दानी ४३ प्रतिशतले वृद्धि भएकाले नाफा बढेको हो ।गत आवको दोस्रो त्रैमासमा कम्पनीले रू. १६ करोड ८१ लाख आम्दानी गरेकोमा चालू आवको सोही अवधिमा वृद्धि भएर रू. २४ करोड १७ लाख पुगेको हो । चुक्तापूँजी रू. १ अर्ब रहेको उक्त कम्पनीले जगेडा कोषमा रू.३७ करोड ७२ लाख सञ्चित गरेको छ । चालू आवको दोस्रो त्रैमाससम्ममा कम्पनीको बीमा कोषमा रू. ९० करोड ८ लाख जम्मा भएको छ ।

सोही अवधिमा कम्पनीको कुल बीमाशुल्क रू. १ अर्ब २६ करोड २० लाख आर्जन भएको छ । त्यसैगरी कम्पनीको जारी बीमालेखको संख्या १ लाख ४१५ ओटा पुगेको छ ।