चीनले बीबीसी विश्व सेवा झूटो र पक्षपाती भएको दाबी गर्दै त्यसमाथि प्रतिबन्ध लगाएको छ ।

बेलायतले चीनको सरकारी च्यानल सीजीटीएनलाई प्रसारण गर्न नदिने बताएको एक हप्तापछि चीनले प्रतिकारात्मक कारवाही गरेको हो । बीबीसीले प्रसारण नियमहरूलाई गम्भीर रूपमा उल्लंघन गरेको आरोप चीनले लगाएको छ । उसले चीनको हितलाई क्षति गरेको र राष्ट्रिय एकतालाई अवमूल्यन गरेको चीनको आरोप छ ।बेइजिङले यसअघि बीबीसीबाट कोरोनाभाइरसका विषयमा र सिन्ज्याङमा उइगुरु मुसलमानहरूको दमनको कभरेज भएको भन्दै झूटो खबर प्रसारण गरेको आरोप लगाएको थियो ।

गत साता बेलायती नियामक ओफकमले सीजीटीभीको प्रसारण अनुमति खारेज गरिदिएको थियो र बेइजिङले प्रतिकार गर्ने धम्की दिएको थियो ।
ओफकमको निर्णय सार्वजनिक भएलगत्तै चीनले बीबीसीविरुद्ध कोभिड–१९ को कभरेजका क्रममा झूटो खबर दिएको भनी आपत्ति जनाएको थियो ।

यससँगै हङकङका प्रसारकहरूले बीबीसीका कार्यक्रमहरू प्रसारण नगर्ने भएका छन् ।