सप्तरी — नेपाली कांग्रेस सप्तरीले आफ्ना कार्यकर्ताहरुलाई झुठा मुद्दा लगाएको भन्दै बिहीबार जिल्ला प्रहरी कार्यालय घेराउ गरेका छन ।

कार्यकर्ताहरुलाई झुठा मुद्दा लगाएर प्रहरीले फसाइरहेको आरोप लगाउँदै सप्तरी कांग्रेसका कार्यकर्ताहरुले नाराबाजी गर्दै प्रहरी कार्यालय घेराउ गरेको हो ।राजनीतिक पूर्वाग्रहले प्रेरित भइ प्रहरीले कांग्रेसीलाई विभिन्न बहानामा झुठा मुद्दा लगाएर फसाउने काम गरेकाले स्थानीय प्रशासनको विरोधमा उत्रनु परेको नेपाली कांग्रेस सप्तरीका सभापति दिनेशकुमार यादवले बताए ।

सभापति यादवको नेतृत्वको जुलुस बिहीबार राजविराज नगर परिक्रमा गर्दे सप्तरी प्रहरी विरुद्ध चर्को नाराबाजी गरेको थियो ।बिहीबार नै प्रमुख जिल्ला अधिकारी र जिल्ला प्रहरी प्रमुखलाई ज्ञापन पत्र बुझाउँदै सप्तरी कांग्रेसले प्रहरीले सत्यतथ्य छानबिन नै नगरी सामाजिक सन्तुलन बिग्रने कार्य गरिरहेको आरोप लगाएको छ । कांग्रेस कार्यकर्ताहरुलाई सिद्धयाउने गरी झुठा मुद्दा दर्ता गरिरहेको आरोप कांग्रेसले लगाएको छ । आफ्ना कार्यकर्ताहरुमाथि लगाइएको झुठा मुद्दा तत्काल खारेज गर्न समेत कांग्रेसले माग गरेको छ ।