एजेन्सी – स्टार खेलाडी क्रिस्टियानो रोनाल्डोले गोल गरे पनि इटालियन सिरी ‘ए’ फुटबलमा साविक विजेता युभेन्ट्स बराबरीमा रोकिएको छ ।

शनिबार राति भएको खेलमा युभेन्ट्स हेलास भेरोनासँग १-१ गोलको बराबरीमा रोकिएको हो ।भेरोनाको मैदानमा एक गोलको अग्रता जोगाउन नसक्दा युभेन्ट्स अंक बाड्न बाध्य भयो ।खेलको ४९औँ मिनेटमा क्रिस्टियानो रोनाल्डोको गोलबाट युभेन्ट्सले अग्रता बनाए पनि ७७औँ मिनेटमा एन्टोनियो बाराकले गोल गर्दै हेलास भेरोनालाई हारबाट जोगाए ।

बराबरीसँगै युभेन्ट्सले शीर्ष दुई टोलिसँगको अंक दूरी कम गर्ने मौका गुमाएको छ । युभेन्ट्स २३ खेलबाट ४६ अंकसहित तेस्रो स्थानमा छ ।भेरोना ३५ अंकसहित नवौँ स्थानमा छ ।