कट्टर दुश्मन रहिआएका साउदी अरब र इरानका वरिष्ठ अधिकारीहरूबीच पाँच वर्षमा पहिलोपटक प्रत्यक्ष कुराकानी भएको छ ।

यो वार्ता इराकको राजधानी बग्दादमा भएको र सम्बन्ध सुधारका लागि पहल गरिएको बताइएको छ । पश्चिम एसियाका यी महत्त्वपूर्ण मुलुकहरूले पाँच वर्षअघि कूटनीतिक सम्बन्ध तोडेका थिए । फाइनान्सियल टाइम्सको समाचारअनुसार, साउदी अरब र इरानबीचको कुराकानीका लागि इराकका प्रधानमन्त्री मुस्तफा अल कदिमीले माहौल मिलाएका हुन् ।

अहिले साउदी अरब यमनमा नराम्ररी फसेको छ र त्यहाँ उसले इरानसमर्थक हूती विद्रोहीको सामना गरिरहेको छ । हूतीहरूले साउदीका तेल कुवा र शहरहरूमा हवाई आक्रमण गर्ने गरेका छन् । हूतीहरूको क्षेप्यास्त्र तथा ड्रोन आक्रमणका कारण साउदीले निकै क्षति सहनुपरेको छ । अहिले इरानसँग वार्ताको पहल साउदीका युवराज मोहम्मद बिन सलमानले अमेरिकाको बाइडन प्रशासनको समर्थन हासिल गर्नका लागि गरेको बताइन्छ । जो बाइडनले इरानसँगको आणविक सम्झौतामा अमेरिकालाई पुनः जोड्ने कोशिश गरिरहेको बताइन्छ ।

अनि बाइडनले साउदीसँगको सम्बन्ध समीक्षा गर्न र यमनमा युद्ध अन्त्य गर्न पनि वाचा गरेका छन् । इरान र साउदीबीच अर्को हप्ता पनि वार्ता हुन सक्ने बताइएको छ ।