सप्तरी – नेकपाका अध्यक्ष द्वय केपी शर्मा ओली र पुष्पकमल दाहाल प्रचण्डबीच विवाद बढेसँगै दोस्रो तहका नेताले भेटघाट र छलफललाई तीव्रता दिएका छन् ।

अध्यक्ष प्रचण्डले पनि नेताहरुसँगको परामर्श तथा छलफललाई तीब्र बनाएका छन् ।केही दिन यता निरन्तर छलफल गर्दै आएका अध्यक्ष प्रचण्डले सोमबार स्थायी कमिटी सदस्यद्वय टोपबहादुर रायमाझी र हरिबोल गजुरेलसँग कुराकानी गरेका छन् । भेटमा उनले ओलीको राजनीतिक दस्ताबेज आएपछि व्यवस्थित छलफलको विधिबाट पार्टीलाई नयाँ उचाइमा एकताबद्ध बनाउन सकिने सम्भावना औँल्याएका छन् ।भेटपछि नेता गजुरेलले पार्टीलाई फुटबाट जोगाउनका लागि दुवै अध्यक्षको भूमिका महत्वपूर्ण हुने प्रचण्डले बताएको उल्लेख गरे ।

नेताहरूसँगको भेटमा प्रचण्डले प्रधानमन्त्री ओलीले पार्टी स्थायी कमिटीको निर्णय नमानेका कारण अहिलेको अवस्था आएको बताएका छन् । नेकपाको सचिवालय बैठक यही मंसिर १३ गते बस्दै छ ।