सप्तरी – सप्तरीको रुपनी गाउँपालिका वडा न. ४ मा एक व्यक्तिको देबता घरमा नाग सर्प निस्केपछि देबता हाे भन्दै पूजापाठ सुरु भएको छ ।

आज विहान स्थानीय श्याम मडरको घरमा नाग देवता दर्शन दिएको हो । सर्पलाई बाहिर निकालेर घर अगाडी रहेको शिव मन्दिरमा राखिएको छ । अहिले त्यहाँ ठूलो भीड लागेको स्थानीयले जनाएको छ । यता सर्पको उद्धार गर्ने प्रयास भइरहेको छ । गर्मीमा सर्प बाहिर निस्किने गर्छ । तर आज पहिलो सोमबारी भएकाले भगवान शिवको रुपमा नाग दर्शन दिएको स्थानीय बताउँछन् ।

यसेबिच सप्तरीको शम्भुनाथ स्थित शम्भुनाथ मन्दिरका साथै राजविराज स्थित भगवती मन्दिर ,महदेवा गाउपालिका स्थित महादेव मन्दिर ,हनुमाननगर कङकालिनि नगरपालिका स्थित रम्परा मल्हनियाकाे महादेव मन्दिर ,छिन्नमस्ता गाउपालिका ४ स्थित लालापटिकाे लालेश्वर नाथ मन्दिर ,बरहि बिरपुर स्थित महादेव मन्दिर लगायतका स्थानमा रहेकाे शिव मन्दिरहरुमा हजारांै भक्तजनहरुकाे भिड लागेकाे थियाे ।