सप्तरी – प्रहरीले जिउँदो सालक सहित दुई जनालाई मध्यपुरथिमि नगरपालिका–१ लोकन्थलीबाट पक्राउ गरेको छ ।

पक्राउ पर्नेमा धादिङ शितली गाउँपालिका–३ झार्लाङ्दी घरभई काठमाडौ महानगरपालिका–२६ कपुरधारा बस्ने २७ वर्षीय ध्रुबबहादुर मगर र सोही ठाउँमा घरभई काठमाण्डौ महानगरपालिका–२६ लैनचौर बस्ने ३१ वर्षीय भिमबहादुर मगर रहेको प्रहरी परिसर भक्तपुरका सुचना अधिकारी प्रहरी नायब उपरीक्षक दीपक गिरीले जानकारी दिनुभयो ।सालक बोकेर हिडिरहेको भन्ने सूचना आएपछि प्रहरी परिसर भक्तपुरको टोलीले लोकन्थलीबाट पक्राउ गरी अनुसन्धान गर्दा भिमबहादुर मगर सशस्त्र प्रहरीका जवान रहेको र उनको साथबाट प्रहरीको परिचय पत्र बरामद भएको उहाँले जानकारी दिनुभयो ।यूरिया मलको ५० केजीको बोरा भित्र प्लाईको बाकसमा जिउँदो सालक बोकेर हिडिरहेको अबस्थामा पक्राउ परेका उनीहरुलाई प्रहरीले थप अनुसन्धानका लागि सालकसहित जिल्ला वन कार्यालय भक्तपुर बुझाएको छ ।

उनीहरुको साथबाट बिभिन्न बैंकका चेकबुक, एटिएम कार्ड, मोवाईललगायतका बिभिन्न सामाग्रीहरु बरामद गरेको छ ।