अमेरिकी राष्ट्रपति जो बाइडन र चिनियाँ राष्ट्रपति सी चिनफिङबीच ताइवानको विषयमा छलफल भएको छ । ताइपेई र बेइजिङबीच तनाव चुलिएको बेला उनीहरू ताइवान सम्झौता पालना गर्न सहमत भएको अमेरिकी राष्ट्रपति बाइडनले बताएका छन् ।

“मैले सीसँग ताइवानको बारेमा कुरा गरेको छु । हामी सहमत छौँ… हामी ताइवान सम्झौताअनुसार काम गर्नेछौँ,” उनले भने, “हामीले स्पष्ट पारेका छौँ कि उनले (चिनियाँ राष्ट्रपति सी)ले सम्झौता पालना गर्नुबाहेक अरू केही गरिरहनुपर्छ भन्ने मलाई लाग्दैन ।” बाइडनले लामो समयदेखि रहेको वासिङ्टनको ‘एक चीन नीति’लाई अपनाएको देखिन्छ, जसले आधिकारिक रूपमा बेइजिङलाई मान्यता दिन्छ न कि ताइपेइलाई । र, ताइवान रिलेसन्स एक्टले ताइवानको सट्टा बेइजिङसँग कूटनीतिक सम्बन्ध स्थापना गर्ने अमेरिकी निर्णयलाई स्पष्ट पार्छ । जसले शान्तिपूर्ण माध्यमबाट ताइवानको भविष्य निर्धारण होस् भन्ने चाहन्छ । चीनले ताइवानलाई आफ्नै भूभागको रूपमा दाबी गर्छ, जसलाई आवश्यक परे बल प्रयोग गरी कब्जा गरिनेछ । तर, ताइवानले भने आफूलाई एक स्वतन्त्र देश भएको र तनावको लागि चीनलाई जिम्मेवार देखाउँदै आफ्नो स्वतन्त्रता र प्रजातन्त्रको रक्षा गर्ने बताइन्छ ।

ताइवानले गएको शुक्रबारदेखि यताका चार दिनमा उसको एयर डिफेन्स जोनमा १४८ चिनियाँ एयर फोर्स विमान उडेको जनाएको छ अमेरिकाले ताइवाननजिक सैन्य क्रियाकलापहरू रोक्न चीनलाई आइतबार आग्रह गरेको थियो ।