एजेन्सी – नेपाली सेनाका प्रधानसेनापति प्रभुराम शर्माले भारतीय स्थल सेनाको मानार्थ महारथीको सम्मान पाएका छन् । भारतका राष्ट्रपति रामनाथ कोविन्दले बुधवार उनलाई मानार्थ महारथीको दर्ज्यानी चिन्ह प्रदान गरेका हुन् । शर्मा भारत भ्रमणमा छन् ।

शर्मालाई राष्ट्रपति भवनमा आयोजित विशेष समारोहमा राष्ट्रपति कोविन्दले सो सम्मान प्रदान गरेका हुन् । शर्मा मंगलबार भारतको नयाँदिल्ली पुगेका थिए । नेपाली सेनाको नेतृत्व समालेपछि उनको यो पहिलो विदेश भ्रमण हो ।

मंगलबार साँझ शर्माले भारतीय समकक्षी मनोज मुकुन्द नरवणेसँग भेटवार्ता गरेका थिए । सन् १९५० देखि नेपाली सेना र भारतीय सेनाका प्रमुखको बीचमा मानार्थ महारथीको सम्मान दिन प्रचलन रहिआएको छ । भारतीय सेनाका प्रमुख नरवणेले २०७७ कात्तिक २१ मा काठमाडौंमा नेपाली सेनाको मानार्थ महारथीको सम्मान लिइसकेका छन् ।

शर्मा भारतीय सेनाको मानार्थ महारथीको सम्मान पाउने १५ औं सेनापति हुन् ।