झापा – भारतबाट ल्याइँदै गरेको ठूलो परिमाणको माछा प्रहरीले बरामद गरेर खाडलमा पुरेको छ।

जिल्ला प्रहरी कार्यालय झापाबाट खटिएको प्रहरी टोलीले आइतबार बिहान गौरादह नगरपालिका- ३ स्थित सहिदगेट अगाडि भारतबाट अवैध रुपमा नेपाल भित्राइएको १६ कार्टुन माछा बरामद गरेको हो।

बरामद गरिएको माछा मे १ च ३६३२ नम्बरको छोटा हात्ती नामक (पिकअप) भ्यानमा हालेर नेपाल ल्याइँदै गरेको अवस्थामा प्रहरीले बरामद गरेको जिल्ला प्रहरी कार्यालय झापाका डीएसपी बसन्त पाठकले जानकारी दिए।

माछाको नेपाली बजार मूल्य १ लाख ९२ हजार रुपैयाँ रहेको प्रहरीले जनाएको छ।

बरामद गरिएको ६४० केजी माछालाई इलाका प्रहरी कार्यालय गौरादहमा आइतबार खाडलमा पुरेको जिल्ला प्रहरी कार्यालय झापाले जनाएको छ।