सप्तरी – अस्ट्रेलिया विरुद्धको पहिलो टी२० मा भारत विजयी भएको छ । रवीन्द्र जडेजाको आक्रमक ब्याटिङपछि टि नटराजन र युजभेन्द्र चाहालले उत्कृष्ट बलिङ गरेपछि भारतले अस्ट्रेलियालाई ११ रनले पराजित गरेको हो । जितपछि भारतले तीन खेलको सिरिजमा १-० को अग्रता समेत बनाएको छ । पहिलो इनिङ्समा घाइते भएका जडेजाको स्थानमा चाहाल दोस्रो इनिङ्समा कन्कसनका रिप्लेसमेन्टका रुपमा खेलेका थिए र उनले आफ्नो फुल कोटा बलिङ गर्दै भारतलाई जित दिलाउन मद्दत गरे ।

क्यानबेरास्थित मानुका ओभलमा भारतले दिएको १६२ रनको लक्ष्य पछ्याएको घरेलु टोली अस्ट्रेलियाले निर्धारित २० ओभरमा ७ विकेट गुमाएर १५० रन मात्र बनाउन सक्यो । अस्ट्रेलियाका लागि आरोन फिन्चले सर्वाधिक ३५, डी आर्ची सर्टले ३४ र मोएसिस अनरिकेजले ३० रन जोडे । सिन एबोट र मिच स्वेप्सन समान १२ रनमा अविजित रहे ।