अफगानिस्तानमा शासन चलाइरहेको तालिबानले पाकिस्तानलाई लक्षित गर्दै छिमेकीको आक्रमण नसहने चेतावनी दिएको छ।

आइतबार तालिबानका कार्यकारी रक्षामन्त्रीले यस्तो चेतावनी दिएका हुन्।

केही दिनअघि तालिबानले पाकिस्तानमाथि आफ्नो भूमिमा बमबारी गरेको भन्दै विरोध जनाएको थियो।

पाकिस्तानले अफगानिस्तानको कुनार र खोस्त प्रान्तमा बमबारी गरेको आराप लगाउँदै उक्त आक्रमणमा दर्जनौं मानिसको मृत्यु भएको बताएको थियो।

काबुलमा एक कार्यक्रमलाई सम्बोधन गर्दै तालिबानका कार्यकारी रक्षामन्त्री मुल्लाह मोम्मद याकुबले भने, ‘हामी विश्व समुदाय र छिमेकी मुलुक दुवैबाट चुनौती र समस्याको सामना गरिरहेका छौं, एक स्पष्ट उदाहरण कुनारमा उनीहरुले गरेको आक्रमण हो।’

उनले थपे, ‘हामी यस किसिमको आक्रमण सहेर बस्दैनौं। हामीले यसपटक राष्ट्रिय स्वार्थलाई ध्यानमा राख्दै आक्रमणलाई सहेका छौं। अर्कोपटक यस किसिमको आक्रमण सह्य हुनेछैन।’

यस विषयमा पाकिस्तानको विदेश मन्त्रालयका प्रवक्ताले प्रतिक्रिया दिँदै भने, ‘पाकिस्तान र अफगानिस्तान दुवै मित्रराष्ट्र हुन्।

दुवै मुलुकको सरकार र जनता आतंकवादलाई गम्भीर खतरा मान्दै आएका छन् र लामो समयदेखि त्यसको सामना गरिरहेका छन्।

त्यसैले दुवै मुलुकले आतंकवादविरुद्ध लड्न सहकार्य गरेर अघि बढ्नु जरुरी छ।