वीरगन्ज — पर्साको सखुवाप्रसौनी गाउँपालिका १ स्थित औराहा निवासी मंगलबहादुर भ्लोनको घर बाहिर गोली प्रहार गर्ने एक जनालाई प्रहरीले नियन्त्रणमा लिएको छ । प्रहरीका अनुसार बुधबार राति करिब साढे ९ बजेको समयमा भ्लोनको घरबाहिर गोली प्रहार भएको थियो ।

पर्सा प्रहरी प्रवक्ता प्रहरी नायव उपरीक्षक ओमप्रकाश खनालका अनुसार बाँसको टाटीमा माटोले लिपेको बेरा भएको भ्लोनको घरको पश्चिमपट्टिको बेराबाट गोली प्रवेश गरी घरभित्र रहेको चामलको बोराभित्र एक राउन्ड गोली फेला परेको थियो ।

अनुसन्धानको क्रममा सोही वडा निवासी २७ वर्षीय सल्टु महतोको संलग्नता रहेको खुल्न आएको प्रहरीले दाबी गरेको छ । घरबाट भाग्ने क्रममा औराहा निवासी महतोलाई राति नै प्रहरीले नियन्त्रणमा लिएको डीएसपी खनालले जनाए । महतोले घरनजिकै खाली जमिनमा रहेको नालामा लुकाइछिपाइ राखेको १२ बोरको एक नाले घरेलु बन्दुकसमेत बरामद भएको छ ।

महतोलाई नियन्त्रणमा लिई हातहतियार तथा खरखजानासम्बन्धी कसुरमा अनुसन्धान भइरहेको प्रहरी उपरीक्षक रमेश बस्नेतले जनाए ।