काठमाडौं – नेपाली कांग्रेसका युवा नेता प्रदीप पौडेलले बलात्कार मुद्दामा उजुरीको हदम्याद कानुनबाट हटाउन माग गरेका छन् । एक युवतीले आफू बलात्कारमा परे पनि न्याय नपाएको कुरा सामाजिक संजालमार्फत सार्वजनिक गरेपछि पौडेलले ट्विटरमार्फत बलात्कारका पुराना घटनाको उजुरी नलिँदा पीडितले हरेस खाने तथा अपराधिले सहजै उन्मूक्ति पाउने अवस्था आउन नहुनेमा उनले सचेत गराएका हुन् ।

“मुलुकी अपराध संहिता २०७४, बालबालिकासम्बन्धी ऐनमा बलात्कार कसुरबारे उजुरीको हदम्याद तोकेको छ । पीडितहरु प्रताडनाबाट गुज्रने गरेको पाइएको छ,” पौडेलले लेखेका छन्, “बलात्कारका पुराना घटनाको उजुरी नलिँदा पीडितले हरेस खाने तथा अपराधीले सहजै उन्मूक्ति पाउने अवस्था छ । यस्ता अपराधमा हदम्याद तोकिनु हुन्न ।”

केहीदिन अघी मात्रै एक युवतीले सुन्दरी प्रतियोगिताका आयोजकबाटै ८ वर्षअघि बलात्कारमा परेको घटना सार्वजनिक गरेपछि सामाजिक सन्जालमा बलात्कारका मुद्दामा उजुरीको हदम्याद हट्नुपर्ने बहस भइरहेको छ ।