काठमाडौं– भारतले दोस्रो पटक टी२० विश्वकपको उपाधि जितेपछि कप्तान रोहित शर्मासहित विराट कोहली तथा रविन्द्र जडेजाले टी२० क्रिकेटबाट सन्यास लिए । उनीहरुले सन्यास लिएपछि अब भारतको टी२० टिमको कप्तान को बन्छ ? भन्ने वहस प्रारम्भ भएको छ । भारतका तीन सिनियर खेलाडीसहित प्रमुख प्रशिक्षक राहुल द्रविडको समेत कार्यकाल समाप्त भएको छ ।

अब भारतको टी२० टिमको कप्तानीमा प्रमुख चार खेलाडीको चर्चा रहेको छ, जसमा हार्दिक पाण्डेय, सूर्यकुमार यादव, ऋषभ पन्त तथा जसप्रित बुमराहको नाम अगाडि आएको छ । उनीहरुबाहेक शुभमन गिल र केएल राहुलसमेत भारतको टी२० क्रिकेटको कप्तान बन्न सक्ने चर्चा चलिरहेको छ ।

टी२० टिमको कप्तानको दावेदारको दौडमा हार्दिक पाण्ड्या सबै भन्दा अगाडि छन् । उनीसँग टी२० अन्तर्राष्ट्रियमा १०० खेलको अनुभव छ, जुन अन्य कुनै दावेदारसँग छैन । पाण्ड्याले १६ टी२० अन्तर्राष्ट्रिय खेलमा भारतको कप्तानीसमेत गरिसकेका छन्, जसमध्ये टोलीले १० खेल जितेको छ ।

गुजरातलाई पहिलो सीजनमा आइपीएल च्याम्पियन बनाएका हार्दिक हाल मुम्बई इण्डियनको समेत कप्तान रहेका छन् । पाण्ड्याले भारतलाई ९० प्रतिशत द्विपक्षीय शृङ्खलामा जीत दिलाएका छन् । जसमध्ये भारतीय टोलीले ४ वटा सीरीज जितेको छ । टोलीले एउटा मात्र सीरीजमा हार व्यहोरेको थियो । भारतलाई विश्वकप जिताउन पाण्डेयले गरेको शानदार प्रदर्शनले उनको कप्तानीको दाबेदारीलाई थप बलियो बनाएको छ ।

त्यस्तै कप्तानीको दौडमा ऋषभ पन्त रहेका छन् । कार दुर्घटनापछि क्रिकेटमा पुनरागमन गरेका पन्तले अहिले उत्कृष्ट प्रदर्शन गरिरहेका छन् । दिल्ली क्यापिटल्सका समेत कप्तान रहेका विकेटकीपर ब्याट्सम्यान पन्तले टी–२० अन्तर्राष्ट्रियमा ७४ खेल खेलेर ११५८ रन बनाएका छन् । उनले ५ खेलमा भारतको कप्तानी गरेका थिए भने दुई खेलमा जीत हासिल गरेका थिए ।

त्यस्तै कप्तानीको दौडमा सुर्यकुमार यादव पनि रहेका छन् । सूर्यकुमार यादवले आफ्नो बलियो प्रदर्शनका साथ टीम इन्डियाको कप्तान बन्ने दावी गरिरहेका छन् । ६८ खेलमा १६७.७४ को स्ट्राइक रेटमा यादवले २३४० रन बनाएका छन् । उनले आफ्नो कप्तानीमा शतक प्रहार गरेका छन् । सूर्यको कप्तानीमा भारतले ७ खेलमा ५ खेल जितेको छ । सूर्यले आफ्नो कप्तानीमा १६४.८३ को स्ट्राइक रेटमा ३०० रन बनाएका छन् ।

त्यसैगरी जसप्रित बुमराह पनि टी२० टिमको कप्तानीको दौडमा रहेका छन् । जसप्रित बुमराह, भारतीय टोलीमा ट्रम्प कार्डको रुपमा रहेका छन् । ७० खेलमा ८९ विकेट लिएका बुमराह टिम संकटमा रहेको समयमा विकेट लिएर टिमलाई जीतको बाटोमा लैजाने बलरको रुपमा चिनिन्छन् । उनको यसअघि भारतीय टिमको मात्र दुई खेलमा कप्तानी गरेका छन् र दुवै खेल जितेका छन् ।

यीबाहेक हाल गुजरात टाइटन्सका कप्तान रहेका शुभमन गिललाई रोहित शर्मापछि भारतको सबै फर्म्याटको कप्तानको रुपमा हेरिएको छ । पहिलो पटक गुजरातको कप्तानी गरेका गिलले धेरैलाई प्रभावित समेत गरेका थिए । यस विश्वकपमा गिल ट्राभल खेलाडीको रुपमा समावेश रहेका थिए ।

त्यस्तै आइपिएल टिम लखनउ सुपर जाइन्टका कप्तान रहेका केएल राहुल पनि टी२० टिमको कप्तान बन्न सक्ने बताइएको छ । उत्कृष्ट ब्याट्सम्यान र विकेट किपरको पहिचान बनाएका राहुल यस विश्वकप टिममा भने परेका थिएनन् ।