सप्तरी – नाइजेरियाको उत्तरी राज्य कितसिनाबाट करिब एक हप्ताअघि बन्दुकधारीहरूले विद्यालयमा आक्रमण गरी बेपत्ता पारिएका तीन सय ४४ विद्यार्थी मुक्त भएका सो राज्यका गभर्नर अमिनु मासारीले जानकारी दिएका छन् ।

अपहरणमुक्त भएका प्रायः विद्यार्थी छात्र भएको मसारीले नाइजेरियाली टेलिभिजन एनटिएनलाई बताएका छन् । हाल ती विद्यार्थी कितसिना राज्यतर्फ फर्किँदै छन् । उनीहरूको स्वास्थ्य उपचार गराई परिवारको जिम्मा लगाइने मासारीले बताए । कितसिना राज्यको कंकरा इलाकामा रहेको सरकारी विज्ञान माध्यमिक विद्यालयका विद्यार्थीलाई गत डिसेम्बर ११ का दिनमा विद्यालयमा आक्रमण बन्दुकधारी समूहले अपहरण गरेका थिए ।स्थानीय सञ्चारमाध्यमका अनुसार ती विद्यार्थीलाई छिमेकी राज्यको एक विशाल जंगलमा लगिएको थियो । बन्दुकधारीले गरेको सो हमलामा तीन सय ४४ जना बालबालिका हराएका थिए ।बोकोहराम नामक आतंककारी संगठनले बुधबार ती बालबालिका आफूले अपहरण गरी लगेको र अहिले पनि उनीहरू आफूसँगै रहेका बताएको थियो ।
सो राज्यका गभर्नर मासारीले बालबालिका अपहरण परेको सूचना प्राप्त भएपछि खोजी जारी राखिएको बताए ।

बोकोहराम संगठनका नेता अबुबाकर सेकाउले बुधबार एक अडियो सन्देश पठाएर ती विद्यालयमा आफूले अपहरण गरेको भन्दै विद्यालयका तीन सय ४४ जना बालबालिका आफूहरूसँग रहेको बताएका थिए ।सो विद्यालयमा आठ सय ३९ जना विद्यार्थी अध्ययनरत छन्। नाइजेरियाको बोकोहरामले विद्यालयबाट विद्यार्थीलाई अपहरण गरेर लैजाने र आफ्नो सैन्य समूहमा भर्ती गर्ने गर्दछन् ।