सप्तरी – प्रधानमन्त्री एवम् सत्तारुढ नेपाल कम्युनिष्ट पार्टी (नेकपा) अध्यक्ष केपी शर्मा ओली पार्टीका कार्यकारी अध्यक्ष पुष्पकमल दाहाललाई भेट्न आज शनिबार खुमलटार जाँदैछन् ।

पार्टीमा आन्तरिक विवाद चर्किरहेका बेला ओली दाहाललाई भेट्न खुमलटार जानुलाई निकै चासोपूर्ण रुपमा हेरिएको छ ।प्रधानमन्त्री ओली जाने भएपछि खुमलटार क्षेत्रमा बाक्लो संख्यामा सुरक्षाकर्मी ‘अलर्टमा’ राखिएको छ ।शुक्रबार मात्रै दाहाल – नेपाल समूहले पेरिसडाँडामा प्रदेश एकका जिल्ला अध्यक्ष र सचिवहरुको भेला आयोजना गरेका थिए । माधव कुमार नेपाल र प्रचण्ड समूहले जनवर्गीय संगठनको कार्यालय पेरिसडाँडामा प्रदेश – १ का आफूनिकट जिल्ला अध्यक्ष, सचिव र केन्द्रीय सदस्यहरूको भेलामा संगठित विरोधमा उत्रिन निर्देश गरेका थिए । यता अध्यादेश फिर्ता लिने सहमति गरेका ओलीले फिर्ता भने लिइसकेका छैनन् ।

प्रधानमन्त्रीमा निर्वाचित भएपछि पहिलो पटक ओली दाहाललाई भेट्न उनकै निवासमा जान लागेका हुन् ।