सप्तरी : अफगानिस्तानको सुरक्षाकर्मीले तालिवान विद्रोहीको आधार क्षेत्र मानिने कान्दाहार प्रान्तमा गरेको सुरक्षा कारवाहीमा कम्तीमा ७४ विद्रोही मारिएको अफगानिस्तानको रक्षा मन्त्रालयले आइतबार जानकारी गराएको छ ।

अमेरिकी प्रतिनिधिले तालीवानी समूहसँग अफगानिस्तानको शान्तिका लागि गरेको सम्झौतापछि केही मत्थर बनेको द्वन्द्व सरकार र विद्रोहीले आफ्नो प्रभाव देखाउन गरेका आक्रमण र प्रत्याक्रमका कारण थप सक्रिय देखिँदा सम्झौताबाट आशावादी बनेको विश्व समुदाय चिन्तित बनेको छ।
रक्षामन्त्रालयले ट्‍वीटरमार्फत् जारी सूचनामा भनिएको छ, ‘कान्दाहारको झेरिया, दाँद, पञ्ज्वाव र अर्गान्दाव जिल्लाहरूमा विगत २४ घण्टामा गरिएका कारवाहीमा ७४ तालिवान लडाकूको मृत्यु भएको छ।’

74 #Taliban were killed and 15 others were wounded in Zheria, Dand, Panjwae and Arghandab districts of Kandahar province, yesterday. They were preparing to attack #ANDSF positions when they were targeted by #ANA. Additionally, a large amount of their weapons were destroyed.

— Ministry of Defense, Afghanistan (@MoDAfghanistan) December 20, 2020

सरकारी सेनाको नियन्त्रणमा रहेको भूभागमा विद्रोहीले आक्रमणको तयारी थालेको आरोप लगाउँदै सेनाले सुरु गरेको कार्बाहीका क्रममा उनीहरूको मृत्यु भएको मन्त्रालयले जनाएको छ।

कारवाहीका क्रममा विद्रोही समूहबाट ठूलो सङ्ख्यामा हतियार तथा बन्दोबस्तीका सामान नियन्त्रणमा लिएको सरकारी अधिकारीले दाबी गरेका छन्।

कान्दाहारमा हालैका दिनमा भीषण झडप भएका र यसका कारण अघिल्लो साता मात्र ८२ व्यक्तिको मृत्यु भएको थियो।