सप्तरी – माधव नेपाल-पुष्पकमल दाहाल समूह नेपाल कम्युनिस्ट पार्टी (नेकपा)का स्थायी समिति सदस्य घनश्याम भुसालले मुलुकमा संसद् पुनर्स्थापना वा सत्यानाशको बाटोबाहेकको अर्को विकल्प नभएको बताएका छन् ।

गृहजिल्ला रूपन्देहीका अगुवा कार्यकर्ता भेलालाई सम्बोधन गर्दे नेता भुसालले संसद् पुनर्स्थापनाबाहेक अन्य कुनै बाटोले मुलुकलाई अगाडि लैजान नसक्ने दाबी गरे । ‘जनताले अब संसद् पुनर्स्थापना रोज्ने कि मुलुक र विधिको शासनको बाटो रोज्ने बेला आएको छ’, भुसालले भने ।प्रधानमन्त्री केपी ओलीले लोकतन्त्रमाथि प्रहार गरेको उनले बताए । संविधान, लोकतन्त्र र स्थिरतामाथिको प्रहारलाई हरेक पटक जनताले पराजित गरेको उल्लेख गर्दै नेता भुसालले अहिले पनि जनताले संसद् पुनर्स्थापना गरेरै छाड्ने ठोकुवा गरे ।नेता भुसालले अदालतले पुनर्स्थापना नगरे जनताले विद्रोहका माध्यमबाट सडकबाटै संसद् पुनर्स्थापना गर्ने चेतावनी दिए ।सबै संवैधानिक शक्ति मुठीमा लिएर बसेका राजाले विघटन गरेको संसद् ब्युँताउन सक्ने जनता संविधानमै नभएको अधिकार प्रयोग गरेर अहिलेका प्रधानमन्त्रीले गरेको प्रतिनिधिसभा विघटन उल्टाउन सक्षम रहेको प्रतिक्रिया दिए ।उनले भने, ‘अहिले ओली समूहमा लागेकामध्ये एक जना पनि प्रधानमन्त्रीले ठीक गरे भनेर गएका होइनन् । दुई-चार जना गएका छन्, ती सबै व्यक्तिगत कारणले गएका हुन् ।’

पूर्वसभामुख ओनसरी घर्तीले प्रधानमन्त्री ओलीको सरकार कामचलाउ मात्र रहेकाले केही गर्न नसक्ने बताइन् । प्रधानमन्त्री ओलीले नै प्रतिनिधिसभा विघटन भएको स्वीकारेपछि मन्त्रिपरिषद् विस्तार हुनै नसक्ने दाबी उनले गरिन् । घर्तीले भनिन्, ‘एउटै घरमा बसेका हामी महाभारतमा पाण्डव र कौरव जसरी भिड्नुपरेको छ ।’