सप्तरी – इण्डोनेशियाको श्रीविजय एयरको विमान दुर्घटना भएको स्थल फेला पारेको इण्डोनेशियाका अधिकारीहरुले बताएका छन् । शनिबार राजधानी जाकार्ताबाट उडेको छोटो समयमै दुर्घटना भएको बोइङ ७३७ विमान समुद्रमा दुर्घटना भएको अधिकारीहरुलाई उद्धृत गर्दै बीबीसीले जनाएको छ । जाकार्ताबाट पश्चिम कालिमान्तान राज्यको पोन्टियांकका लागि उडेको विमान टेकअफ गरेको ४ मिनेटमै राडारको सम्पर्कबाट हराएको थियो । विमानमा ५० यात्रु र १२ क्रु सदस्य गरी ६२ जना थिए ।

सम्भावित दुर्घटनास्थलमा अहिले नेवीका गोताखोरहरुसहित १० भन्दा बढी पानीजहाजहरु परिचालन गरिएका छन् । ‘हामीले २ विन्दूमा संकेतहरु फेला पारेका छौं, यो सम्भवतः विमानको ब्ल्याक बक्स हुन सक्छ’ इण्डोनेशियाको खोजी तथा उद्धार एजेन्सीका प्रमुद बागुस पुरुहितोले भने । अनुसन्धानकर्ताहरुले समुद्रमा फेला परेका र विमानबाट उछिट्टिएका हुन सक्ने मानिएका वस्तुहरुको पनि विश्लेषण गरिरहेका छन् । जाकार्ता पुलिसका प्रवक्ता युसरी युनिसले खोजी तथा यद्धारको क्रममा २ झोलाहरु फेला परेको बताएका छन् ।