काठमाडौं- काठमाडौंको चावहिलस्थित ॐ हस्पिटल एण्ड रिसर्च सेन्टरको मेडिकल डाइरेक्टरमा डा हरिश जोशी नियुक्त भएका छन् ।अस्पतालमा आज आयोजित एक समारोहका बीच डा जोशीले पदभार ग्रहण गरेका छन्।

ॐ अस्पताल संचालक समितिका अध्यक्ष समेत रहेका सिनियर कन्सल्ट्यान्ट रेडियोलोजिष्ट डा आनन्द प्रसाद श्रेष्ठले उनलाई स्वागत गरेका थिए।

अध्यक्ष डा श्रेष्ठले डा जोशी एक अत्यन्त दक्ष चिकित्सकका साथै कुशल व्यवस्थापक समेत रहेको जिकिर गर्दै उनको नेतृत्वमा अस्पतालको चिकित्सा सेवा थप व्यवस्थित र सुदृढ हुने विश्वास व्यक्त गरे।

समारोहमा आफ्नो संक्षिप्त मन्तव्य राख्ने क्रममा नवनियुक्त मेडिकल डाइरेक्टर डा जोशीले ॐ अस्पताल नेपालको निजी क्षेत्रबाट सञ्चालित अग्रणी सेवा प्रदायक भएको उल्लेख गर्दै अब समय सापेक्ष सुधारसँगै अघि बढ्ने प्रतिवद्धता व्यक्त गरे।

सो अवसरमा विश्ननाथ कोइराला र नर्सिङ डाइरेक्टर उमा श्रेष्ठ तथा कर्मचारी युनियनका अध्यक्ष केशव चौलागाईंले स्वागत मतव्य राखेका थिए।

ॐ अस्पतालको स्थापनाकालदेखी नै सेवारत डा जोशीले यस अघि पनि लामो समयसम्म ॐ अस्पतालको मेडिकल डाइरेक्टरको रुपमा काम गरिसकेका छन्।