नेपाली सिने उद्योगमा सफल मानिएको चलचित्र सिरिज ‘कबड्डी’ को चौथो सिरिज भन्ने भएको छ । निर्देशक रामबाबु गुरुङले चलचित्र ‘ कबड्डी ४’ निर्माणको औपचारिक घोषणा गरेका छन् ।

पहिलो सिरिजबाटै राम्रो प्रतिक्रिया बटुल्दै आएको यो चलचित्रको चौथो सिरिज नै अन्तिम सिरिज हुने निर्देशक गुरुङले बताए । सामाजिक सञ्जाल फेसबुकमार्फत चलचित्र निर्माणको घोषणा गरेका गुरुङले यो चलचित्र २०७८ सालमा रिलिज गर्ने बताएका छन् ।बाँसुरी फिल्म प्रोडक्सनको प्रस्तुति चलचित्र ‘कबड्डी ४’को कथा पनि निर्देशक गुरुङले नै लेखेका हुन् । पछिल्लो पटक चलचित्र ‘सेन्टी भाइरस’ निर्देशन गरेका गुरुङले अन्य चलचित्रको स्क्रिप्टमा पनि काम गरिरहेको बताएका छन् ।

आगामी वैशाखदेखि छायाङ्कनमा जाने यो चलचित्रमा पुरानै सिरिजका केही कलाकार दोहोरिने गुरुङको भनाइ छ । केही नयाँ कलाकार मिसिने पनि गुरुङले जानकारी दिए ।