हुम्लाकाे नाम्खा गाउँपालिकाको वडा नम्बर ६ हिमालपारीको गाउँ लिमीका बालबालिकाहरुले नियमित खोप लगाउन पाएका छैनन्।

लिमी प्रवेश गर्ने नारा र न्यालु लेकमा हिमपातले गर्दा बाटो अवरुद्ध भएपछि बालबालिका खोपबाट बन्चित भएका हुन्।गत कात्तिक महिनाबाट लिमीका तीनवटै गाउँका बालबालिकाहरुले नियमित खोप लगाउन नपाएको हल्जी गाउँका छिरिङ तामाङले बताए। गाउँमा स्वास्थ्यचौकी भएपनि स्वास्थ्यकर्मी कोही पनि नहुँदा बालबालिका नियमित खोपबाट बन्चित रहेकेा उनले बताए।

कोही पनि स्वास्थ्यकर्मी हिउँदको समयमा नबस्ने गरेका कारण याे अवधिमा बालबालिकाले खोप लगाउन नपाइरहेकाे वडाअध्यक्ष पाल्जोर तामाङले बताए ।स्वास्थ्यकर्मीलाई हिउँदको समय पनि लिमीमै बस्न आग्रह गर्दा नमान्ने गरेकाे उनले गुनासाे गरे।

लिमी स्वास्थ्य चौकीका इन्चार्ज गोर भण्डारीका अनुसार गत कात्तिक पहिलो हप्ता लिमी छोडेका स्वास्थ्यकर्मी लिमी जाने बाटो बन्द भएपछि राेकिएका छन्।