इजरायल र प्यालेस्टाइनबीच संघर्ष जारी छ । यो विवादमा चीन खुला रुपमा प्यालेस्टाइनको समर्थनमा आएको छ ।

चीनको मिडिया पनि लगातार प्यालेस्टाइनको पक्षमा बोलिरहेको छ । यसैलाई लिएर इजरायली दूतावासले सामाजिक संजालमार्फत चीनको विरोध गरेको छ ।इजरायली दूतावासले पोस्टमा भनेको छ ‘हामी अपेक्षा गर्दछौं कि यहुदहिरुको विश्वमा नियन्त्रण गर्ने सिद्धान्त अब पुरानो भइसकेको छ । योसिद्धान्त एक षड्यन्त्रको रुपमा ल्याइएको थियो । दुर्भाग्यले यहुदी विरोधी अनुहार फेरि अगाडि आएको छ । सरकार नियन्त्रित चीनको मिडियाको खुलेआम यहुदी विरोधी कभरेज चिन्ताको विषय हो ।’

मंगलबार चीनको सरकारी मिडिया चाइना ग्लोबल टेलिभिजन नेटवर्कमा होस्ट चेंग चुनफै.गले इजरायललाई अमेरिकाले दिएको समर्थनको विरोध गरेका थिए । यसमा इजरायलले आफ्नो आपत्ति जनायो । त्यसपछि समाचार एजेन्सी एएफपीले पनि चीनको विजदेश मन्त्रालयसँग प्रश्न सोधेको थियो । जवाफमा त्यहाँका प्रवक्ताले आफूलाई जानकारी नभएको बताए । यद्यपि प्रवक्ताले इजरायल र प्यालेस्टाइनको संघर्षको विषयमा चीनको धारणा स्पष्ट रहेको बताए ।यसअघि चीनले संयुक्त राष्ट्रसंघको सुरक्षा परिषदमा इजरायलले प्यालेस्टाइनमाथि गरिरहेको आक्रमण विरुद्ध निन्दा प्रस्ताव ल्याइसकेको छ । तर, अमेरिकाले भिटो प्रयोग गरेर उक्त प्रस्ताव पारित हुन दिएन । अमेरिकाले आफैंले कुटनीतिक रुपले दुई देशबीच संघर्षविराम गराउन प्रयास गरिरहेको भन्दै चीनले ल्याएको प्रस्ताव रोकेको थियो । १५ सदस्यीय सुरक्षा परिषदमा कुनै एक देशले विरोध गरे साझा प्रस्ता पारित हुन सक्दैन ।

चीनले इजरायल र प्यालेस्टाइनबीचको संघर्षमा अमेरिकाको भूमिकामाथि प्रश्न उठाएको छ । चीनको विदेश मन्त्रालयले एक बयान जारी गर्दै इजरायल र प्यालेस्टाइनको संघर्षमा अमेरिकाको भूमिकालाई निराशाजनक भनेको छ । चीनको विदेश मन्त्रालयले के यही मानवअधिकार हो ? भनेर प्रश्न गर्दै प्यालेस्टाइन पीडित हुँदा अमेरिकाले विश्वलाई के सन्देश दिन चाहेको भन्ने प्रश्न उठाएको छ । चीन इजरायल र प्यालेस्टाइन दुवै पक्षबाट संघर्षविराम हुनुपर्ने अपिल गरेको छ ।साउदी अरेबिया, टर्की, पाकिस्तान, चीन समेत कैयौं देशले प्यालेस्टाइनलाई अलग देश बनाउन माग गरेका छन् । यी सबै देशहरुले स्थायी समाधानमा लागि प्यालेस्टाइन एक स्वतन्त्र मुलुक बन्नुपर्ने बताएका छन् । उनीहरुले यसको राजधानी पनि जेरुसेलम हुनुपर्ने भनेका छन् । उता इजरायलको पक्षमा भिटो प्रयोग गरेको अमेरिकाले इजरायललाई युद्ध रोक्न भनेको छ ।

अमेरिकी राष्ट्रपति जो बाइडेनले फोनमा इजरायली प्रधानमन्त्री बेन्जामिन नेतन्याहुसँग कुरा गर्दै संघर्षविरामका लागि ठोस कदम उठाउन भनेका थिए । तर, इजरायली प्रधानमन्त्री बेन्जामिन नेतन्याहुले एक अन्तरवार्तामा प्यालेस्टाइन र हमासमाथि आक्रमण नगर्ने प्रस्ट पारेका थिए । उनले भनेका थिए ‘यी आक्रमण त्यतिबेलासम्म बन्द हुँदैनन जबसम्म हामी हमासलाई नष्ट पार्दैनौं किनकि यसो नगरी शान्ति सम्भव छैन ।’