अर्घाखाँची जिल्लामा संक्रमितको संख्या बढेसँगै दुई साता निषेधाज्ञा थप गरिएको छ।

थपिएको निषेधाज्ञा साउन ३० सम्म जारी गरिने जिल्ला प्रशासन कार्यालयले जनाएको छ । साउन १६ गते मध्यरातिबाट निषेधाज्ञा लागू हुनेछ । जिल्ला अधिकारी विष्णु पौडेलको अध्यक्षतामा बिहीबार बसेको बैठकले दुई साताका लागि निषेधाज्ञा जारी गर्ने निर्णय गरेको हो ।

निषेधाज्ञाको समयमा सरकारी तथा गैरसरकारी अफिस पूर्णरूपमा बन्द रहनेछन् । यसै गरी सार्वजनिक तथा निजी सवारीसाधन पनि बन्द रहनेछन् । खाद्यान्न पसल बिहान ६ बजेदेखि ९ बजेसम्म जनस्वास्थ्य मापदण्ड अपनाएर मात्र खोल्न पाइनेछ । औषधि तथा स्वास्थ्य सामग्री भने चौबीसै घन्टा उपलब्ध हुनेछ ।

अर्घाखाँचीमा हालसम्म तीन हजार २५१ जनामा कोरोना संक्रमण पुष्टि भइसकेको छ । हाल जिल्लामा ५४४ सक्रिय संक्रमित रहेका छन् ।