काठमाडौं – विदेशबाट फर्किएका सिराहाका रामेश्वर रामलाई अपहरणगरी बन्धक बनाउने तीन जना पक्राउ परेका छन्। महानगरिय प्रहरी परिसर काठमाण्डौका प्रवक्ता दिनेशराज मैनालीका अनुसार सिराहाका ३० वर्षीय रामेश्वर गत असोज ८ गते विहान ७ बजे दुबईबाट फर्किएका थिए। उनी बल्खुस्थित होटल कन्चनजङ्गामा बसेका थिए।

होटलमै बसेको अवस्थामा नचिनेका व्यक्ति आई उनलाई अपहरणगरी काठमाडौं-२७ ज्याठामा रहेको होटल प्लेजर होमको कोठामा लगेर कुटपिट गरेका थिए। ज्यान मार्ने धम्की दिँदै चुरोटका ठुटाले पोलेर यातना दिएका थिए। उनको झोला र मोबाइलसमेत लिगेका थिए।

उनी होटलबाट भागेर प्रहरीको सम्पर्कमा गएर जाहेरी दिएका थिए। घटनाको अनुसन्धान गर्ने क्रममा अपहरण तथा बन्धक कार्यमा संग्लन काठमाण्डौ तारकेश्वर-८ का संजोग राई, सोहि ठाउँका रमेश अर्याल र मकवानपुरगढी-५ घर भै हाल कामनपा-१६का गोकुल घिमिरे पक्राउ परेका छन्।