सप्तरी – बिहीबार बिहान बौद्ध गोकर्णेश्वर नगरपालिका-२ नयाँपाटीमा २७ वर्षीया पेम्बा शेर्पा र उनकी एक महिने छोरी मृत फेला परेका हुन्।

सिन्धुपाल्चोकका उनीहरू नयाँपाटीस्थित डेरामा मृत फेला परेका हुन्। त्यस्तै, उनका ३२ वर्षीय श्रीमान दोर्जे शेर्पा अचेत अवस्थामा फेला परेका हुन्। उनको नेपाल मेडिकल कलेजमा उपचार भइरहेको महानगरीय प्रहरी वृत्त, बौद्धका प्रहरी नायब उपरीक्षक(डिएसपी) नविन कार्कीले बताए।

उनका अनुसार अहिले दोर्जेको स्वास्थ्यमा सुधार आएको छ।बिहान अबेरसम्म बोलाउँदा पनि कोठाबाट ननिस्किएपछि घरबेटीले प्रहरीलाई खबर गरेका थिए।८ बजेतिर प्रहरी पुगेर हेर्दा आमा-छोरी मृत फेला परेको र बुवा अचेत अवस्थामा फेला परेको डिएसपी कार्कीले बताए। प्रहरीले राति झ्याल ढोका बन्द गरी हिटर बालेर सुतेको हुँदा निस्सासिएर मृत्यु भएको हुनसक्ने आशंका गरेको छ।

‘राति झ्याल ढोका बन्द गरेर हिटर बालेको रहेछ,’डिएसपी कार्कीले भने, ‘त्यसै कारणले निस्सासिएर मृत्यु भएको हो कि भन्ने प्रारम्भिक अनुसन्धानबाट देखिएको छ।’प्रहरीले घटनास्थलमा पुगेर थप अनुसन्धान गरिरहेको छ।