सप्तरी – नेपाल कम्युनिष्ट पार्टी (नेकपा) का सचिवालय सदस्य एवं उपप्रधानमन्त्री इश्वर पोखरेल अध्यक्ष पुष्पकमल दाहाल ‘प्रचण्ड’लाई खुमलटारमा भेटेर फर्किएका छन्।

बिहान साढे १० बजेतिर खुमलटार पुगेका पोखरेल करिब एक घण्टा बसेर फर्किएको पोखरेलको सचिवालयले जनाएको छ। तर दुवै नेताबीच कुन-कुन विषयमा छलफल भयो भन्ने विषयमा जानकारी नभएको पोखरेलका स्वकीय सचिव दीपेन्द्र श्रेष्ठले बताए। ‘बिहान प्रचण्ड कमरेड र इश्वर कमरेडबीच भेटघाट भयो’ श्रेष्ठले भने, ‘कुन–कुन विषयमा छलफल भयो भन्ने विषयमा अपडेट लिन पाएको छैन। सायद पार्टी विवादका विषयमा छलफल भयो होला।’पार्टीमा अध्यक्ष केपी ओली र प्रचण्डवीच संवाद नै हुन छोडेपछि ओलीनिकट नेताहरुले प्रचण्डलाई भेट्न थालेका छन्। बैठकमा भेट भएकोबाहेक ओली र प्रचण्डबीच गत कात्तिक २५ यता एकल रुपमा भेटघाट भएको छैन।

पार्टी विवादका विषयमा राष्ट्रपति विद्यादेवी भण्डारीसमेत सक्रिय भएकी छिन्। बिहीबार राष्ट्रपतिले प्रधानमन्त्री ओली र अध्यक्ष प्रचण्डलाई बोलाएर छलफल गरेकी थिईन्।