गौरादह – झापाको गौरादहमा यही चैत्र ११ गतेदेखि साङ्गीतिक मिनी महोत्सव संचालन भैरहेको छ । महोत्सवमा रोटेपिङका साथमा विभिन्न खेलहरुको मनोरञ्जन लिँदै हरेक दिन स्थानीय कलाकार र ख्यातिप्राप्त कलाकार हरुले स्टेजमा साङ्गीतिक प्रस्तुति प्रस्तुत गरेर दर्शकलाई रोमान्चित बनाउँदै आएका छ्न ।

गौरादह उद्योग बाणिज्य संघ र झापाली युनिटी क्लबको सहयोगार्थ सन्चालित महोत्सवमा हरेक दिन उल्लेख्य मात्रामा दर्शकको उपस्थिति रहँदै आएको मेला आयोजक समितिले जनाएको छ ।

दैनिक रुपमा आफ्नो प्रस्तुतिका लागि मेलामा आउने क्रममा बिहीबार राति ख्यातिप्राप्त चर्चित गायिका ईन्दिरा जोशीले मध्यरातमा आफ्नो प्रस्तुति पस्कदा दर्शकहरु उनीसँगै गीतमा रमाउँदै मनोरञ्जन लिएका थिए । दर्शकको समर्थन र हुटिङ सहितको माहोल देखेर ईन्दिरा जोशी पनि खुशी हुँदै आफ्ना साङ्गीतिक प्रस्तुति पस्कदै दर्शकसँग झुमेको दृश्य एकदमै रोमान्चक देखिएको थियो ।

उनले आफ्ना प्रस्तुति पस्कने क्रममा ‘मोटरसाइकलमा जाऔँ कान्छा घुम्नलाई पछाडि बसेर बुलेट बाइकमा’ भन्ने गीत प्रस्तुति गर्दा स्टेज अगाडि सम्पूर्ण दर्शकहरुले नाच्दै समर्थन गरेका थिए ।

उक्त गीतमा दर्शकहरु उफ्री उफ्री नाच्दा धुलो उडेर स्टेज छोपिँदा एकछिन त गायिका ईन्दिरालाई गीत गाउनै हम्मे हम्मे परेको थियो । आफ्ना प्रस्तुति पस्कने क्रममा दर्शकको माया पाएर आफू एकदमै हर्षित भएको उनले बताइन् ।