विराटनगर – बालिकालाई बलात्कार गरेको आरोपमा मोरङको कटहरीबाट आइतबार एक जना वृद्ध पुरुष पक्राउ परेका छन्।

धनपालथान गाउँपालिका–३ का ६० वर्षीय पुरण ऋषिदेवलाई पक्राउ गरिएको मोरङ प्रहरीका प्रवक्ता डीएसपी दीपक श्रेष्ठले जानकारी दिए। उनका अनुसार ऋषिदेवले कटहरी गाउँपालिका–४ घर भएकी ९ वर्षीया बालिकालाई बलात्कार गरेको प्रारम्भिक अनुसन्धानबाट खुलेको छ।

मजदुरी गर्ने ऋषिदेव केही समयदेखि पीडितकै घरमा बस्दै आएको प्रहरीले जनाएको छ। आमा र बुवा मामा घर गएका बेला शनिबार राति ११ बजेतिर उनले बालिकालाई बलात्कार गरेको भनेर जिल्ला प्रहरी कार्यालयमा किटानी जाहेरी परेको डीएसपी श्रेष्ठले बताए।

बलात्कार पीडित बालिकाको अवस्था सामान्य रहेको प्रहरीले जनाएको छ। अदालतबाट म्याद थप गरेर पक्राउ परेका ऋषिदेवविरुद्ध जबरजस्ती करणी मुद्दामा अनुसन्धान अघि बढाउने प्रहरीको तयारी छ।