हत्याको आरोपमा धरानबाट दुईजना पक्राउ परेका छन्। सुनसरीको धरान उप–महानगरपालिका–५ सेउती खोला बगरमा मृत फेला परेका व्यक्तिको हत्या भएको प्रहरीको आरोप छ।

मृत फेला परेका धरान–११ का ३१ वर्षीय सन्दिप लम्जेलको हत्यामा संलग्न रहेको आरोपमा ईलाका प्रहरी कार्यालय धरानले दुई जनालाई पक्राउ गरेको हो।

जेठ १२ गते बिहान लम्जेल सेउती खोलाको बगरमा शरीरका बिभिन्न ठाउँमा काटिएको र धारिलो हतियारले घोपिएको अवस्थामा लम्जेलको शव फेला परेको थियो।

शवको बारेमा अनुसन्धान गर्दै आएको प्रहरीले लम्जेलको हत्या भएको आशंका गरेको थियो। अनुसन्धानको क्रममा लम्जेलको हत्यामा धरान–१५ बस्ने दुई जना बालकको संलग्नता रहेको प्रहरीको दाबी छ।

दुवै जना बालकलाई पक्राउ गरिएको र उनीहरुको सम्बन्धमा थप अनुसन्धान भइरहेको ईलाका प्रहरी कार्यालय धरानले जनाएको छ।

प्रहरीले हत्यामा संलग्न रहेको आरोपमा पक्राउ परेका बालकको पहिचान गोप्य राखेको छ।