कैलाली – कैलालीको लम्की चुहामा एक पुरुषले आफ्नै आमामाथि बञ्चरो प्रहार गरेका छन्।

सोमबार राति लम्कीचुहा नगरपालिका वडा नम्बर ६ बगमारा बस्ने श्रीराम थारुले आफ्नै आमामाथि बन्चरो प्रहार गरी हत्या गरेका हुन्। ४० वर्षीय श्रीरामले ७१ वर्षीया आमा लगनी थरुनीमाथि बञ्चरो प्रहार गरी घाइते बनाएका थिए।

घाइते थरूनीको नवजीवन अस्पताल धनगढीमा उपचारका क्रममा मृत्यु भएको कैलाली प्रहरी प्रवक्ता वेदप्रकाश जोशीले बताए।

घटनामा संलग्न रहेका श्रीरामलाई अस्थायी प्रहरी पोस्ट चुहाले देउराली सामुदायिक वनबाट पक्राउ गरेको छ। श्रीराममाथि कर्तव्य ज्यानको कसुरमा अनुसन्धान अगाडि बढाइएको प्रहरीले जानकारी दिएको छ।