वीरगञ्ज – प्रहरीले चरेस र गाँजासहित पर्साबाट एक जनालाई पक्राउ गरेको छ। पक्राउ पर्नेमा कालिकामाई गाउँपालिका–१ मुडलीका ४० वर्षीय फुलसरिफ मियाँ रहेका छन्।

ठूलो परिमाणमा लागुऔषध खरिद बिक्री भइरहेको सूचनाको आधारमा मियाँलाई पक्राउ गरिएको प्रहरीले जनाएको छ। प्रहरीले पटेर्वा सुगौली गाउँपालिका–४ अकवा टोलको बाँसघारीबाट मियाँलाई नियन्त्रणमा लिँदा उनको साथबाट ३० किलो गाँजा बरामद भएको थियो।

उनीसँग सोधपुछ गर्दा सोही बाँसघारीमा खाल्डो खनेर बोरामा लुकाएर राखिएको अवस्थामा एक क्विन्टल ९२ किलो चरेस र गाँजाको धुलो दुई क्वीन्टल ६७ किलोसमेत बरामद गरिएको पर्साका प्रहरी प्रवक्ता डिएसपी दिपक भारतीले जानकारी दिए।

पक्राउ परेका मियाँमाथि लागुऔषध कसुरमा थप अनुसन्धान भइरहेको उनले बताए।