काठमाडौँ – बंगलादेशले पाकिस्तानविरुद्धको क्रिकेट इतिहासमै पहिलो पटक टेस्ट सिरिज जितेको छ। बंगलादेशले रावलपिन्डीमा भएको दोस्रो टेस्टमा पाकिस्तानलाई मंगलबार ६ विकेटले पराजित गर्दै सिरिज कब्जा गरेको हो। बंगलादेशका लागि लिट्टन दासले पहिलो इनिङमा शतक प्रहार गरेका थिए।

यसअघि बंगलादेशले पहिलो टेस्टमा पाकिस्तानविरुद्ध १० विकेटको जित निकालेको थियो। नजमुल हुसेनको कप्तानीमा रहेको बंगलादेशले दुई खेलको सिरिज २–० ले जितेसँगै इतिहास रच्न सफल भयो।

यसअघि दुई टिमबीच अहिलेसम्म ५ खेलको टेस्ट सिरिज भएको थियो। जहाँ सबै खेलमा पाकिस्तान विजयी भएको थियो। दुवै टिमले पहिलो पटक सन् २००१ मा पहिलो टेस्ट खेलेका थिए। यसअघि भने २०२१–०२२ मा एक अर्काविरुद्ध दुई टिम भिडेका थिए।

पाकिस्तान दोस्रो इनिङमा सोमबार १ सय ७२ रनमा अलआउट भएको थियो। जवाफमा बंगलादेशले जितका लागि १ सय ८५ रनको लक्ष्य पाएको थियो। जुन लक्ष्य बंगलादेशल आज पूरा गर्‍यो।

आज ४२ रनको अवस्थाबाट दिनको खेल सुरु गरेको बंगलादेशका लागि नजमुल हुसेन र मोमिनुल हकबीच ५७ बलमा १ सय १९ रनको साझेदारी हुँदा पाकिस्तान पराजयको बलियो आधार तयार भयो। बंगलादेशलाई जित दिलाउन सकिब अल हसन २१ र मुस्फिकर रहिम २२ रनमा अविजित फर्किए।

त्यसअघि पाकिस्तान पहिलो इनिङमा २ सय ७४ रनमा समेटिँदा बंगलादेशले २ सय ६२ रन बनाएको थियो। तर, दोस्रो इनिङमा १ सय ७२ रनमै पाकिस्तान अलआउट हुँदा जितका लागि बंगलादेशले १ सय ८५ रनको लक्ष्य पायो। जुन लक्ष्य बंगलादेशले ४ विकेट गुमाएर पूरा गर्‍यो।