सप्तरी – इंग्लिस प्रिमियर लिगको शीर्षस्थानमा रहेको टोटेनहम र लिभरपुलबीच आज राति प्रतिस्पर्धा हुँदैछ । खेल लिभरपुलको मैदानमा राति १ः४५ बजे हुनेछ ।

यो खेल दुवै टोलीको लागि उत्तिकै महत्त्वपुर्ण छ । एक खेलमा जित हात पार्ने टोलीले शीर्षस्थानमा ३ अंकको अग्रता बढाउने छ । शीर्षस्थानमा रहेको टोटेनहम र लिभरपुलको समान १२ खेलबाट २५ अंक रहेको छ । गोल अन्तरमा टोटेनहम अघि रहेको छ ।घरेलु मैदानमा लिभरपुल टोटेनहमलाई पराजित गर्दै शीर्षस्थानमा उक्लने लक्ष्यमा हुनेछ । टोलीसँग मोहम्मद सलाह, साडियो माने, रोबर्टाे फिर्मिनो, कर्टिस जोनु, जर्जिन्हो वाइनाल्डम, कप्तान जोर्डन हेन्डरसन, एन्ड्रिउ रोबर्टसन, फाविन्हो, जोए मटिप, ट्रेन्ट एलेक्सान्डर अर्नाेल्ड र गोलरक्षक एलिसन बेकरको साथ रहेको छ ।चोटका कारण डिएगा जोटा टोली बाहिर छन् । यस्तै जेम्स मिल्नर, थियागो अलकान्तरा, भर्जिल भान डाइक जद्रान शाकिरी, नावी केइटा र जेम्स मिलनर पनि टोली बाहिर रहेका छन् ।यता, टोटेनहम पनि लिभरपुलाई उसकै मैदानमा हराउदै शीर्षस्थानमा अग्रता लिने लक्ष्यमा हुनेछ । पछिल्लो १० खेलमा अपराजित रहेको टोटेनहम लिभरपुल माथि पनि जित निकाल्दै अपराजित रहने दाउमा हुनेछ ।टोलीसँग ह्यारी केन, ह्युङ मिन सन, जियोभानी लो सेल्सो, पिएरे इमिल होब्सजर्ग, मोउसा सिसोको, सर्जियो रिगुइलोन, इरिक डाएर, टोवी एल्डरवेइरेल्ड, सर्जी औरिएर र गोलरक्षक ह्युगो लोरिसको साथ रहेको छ । यो सिजन ह्यारी केन र सनको जोडीले उत्कृष्ट प्रदर्शन गरिरहेका छन् । लिभरपुलविरुद्ध पनि यि दुई जोडी मुख्य हतियार हुनेछन् ।यि दुई टोलीको पछिल्लो २३ खेलको नतिजामा लिभरपुल १२ खेलमा विजयी भएको छ । टोटेनहमले ५ खेलमा जित दर्ता गर्दा ६ खेल बराबरीमा सकिएको छ ।

पछिल्लो ६ खेलमा लिभरपुलले टोटेनहमसँग हार बेहोरेको छैन । जसमा ५ जित र १ बराबरीको नतिजा छ । लिभरपुल सोही अपराजित यात्रालाई निरन्तरता दिने लक्ष्यमा रहँदा टोेटेनहम लिभरपुललाई हराउने दाउमा छ ।