सप्तरी – बलिउड निर्देशक महेश मांजरेकरको मेगा बजेट फिल्म ‘अन्तिम’मा अभिनेता वरुण धवनले मौका पाएका छन्।सलमान खानको मुख्य अभिनय रहेको फिल्ममा वरुणले सानो भूमिकाका लागि इन्ट्री गरेका हुन्। भारतीय सञ्चारमाध्यमका अनुसार फिल्मको एक गीतका लागि निर्माताले वरुणलाई छनौट गरेका हुन्।

फिल्मभित्र कथाको एक पार्टी गीतमा वरुणले अभिनय गर्ने र यो गीत मुम्बईकर स्टाइलमा शुट हुने बताइएको छ। फिल्मको कथामा भने वरुणको कुनै भूमिका रहनेछैन। उनी सलमानसँग नाच्ने मात्रै छन्।वरुणले यो विशेष गीतको शुटिङका लागि आफ्नो व्यस्त सेड्युलबाट दुई दिन समय छुट्याएका छन्।फिल्म ‘अन्तिम’बाट आयुष शर्माले आफूलाई स्थापित गर्ने प्रयासमा छन्। आयुष सलमानका ज्वाईं हुन्। उनले सलमानकी बहिनी अर्पिता खानसँग विहे गरेका थिए।

फिल्म अन्तिमको टिजर पनि रिलिज भइसकेको छ। जसमा सलमान पञ्जाबी पहिरनमा देखिएका छन्। फिल्म २०२१ मै प्रदर्शन हुने बताइएको छ। सलमान र आयुष शुटिङमा छन्।